Stóra öskjusigið

Stærsta öskjusigið til þessa undir Bárðarbungu varð um kl. 5 í morgun.  Þá seig miðja jökulsins yfir Bárðarbungu um meir en einn meter, samkvæmt GPS mælinum, sem er staðsetur yfir miðri öskjunni.  Sjá mynd hér með, sem er af vef Veðurstofunnar.  Ekki er enn ljóst hvort jarðskjálfti hefur verið þessu samfara, en sennilega er þó svo.  Eftir er að yfirfara jarðskjálftagögnin áður en þau birtast á vefnum. Þetta boðar einhverja rúmmálsbreytingu í kvikuþrónni og ef til vill aukið streymi kviku í ganginum og upp á yfirborð.

Viðbætir: Skömmu síðar hefur yfirborð jökulsins hækkað, og er því heildarsigið í þessu atviki um 30 cm.  En þessi sveifla er einkennandi um meiri óróa í lóðréttum hreyfingum jökulsins  undanfarinn sólarhring.  Ef til vill er þaðvegna þess að jökullinn er bæði að brotna og síga.

Athugasemdir

[Bjarni Gunnlaugur (IP-tala skráð) 27.9.2014 kl. 09:12]

Getur verið að sveiflan á hæð yfirborðs jökulsins stafi af því að mikið vatn sé komið undir hann, þannig að þegar askjan sígur um 30 cm þá sekkur jökullinn aðeins meira ofan í vatnið en réttir sig svo af?

[Haraldur Sigurðsson, 27.9.2014 kl. 11:39]

Mér dettur í hug helst að sprungur séu að myndast í jöklinum og að spildur séu að sprreisast á yfirborði hans, þaðr sem GPS mælirinn er staðsettur. Óreglur í mælingum geta verið tengdar slíkum yfirborðshreyfingum, en ekki beinu sigi alls jökulsins.

[Björn Sigurður Lárusson (IP-tala skráð) 27.9.2014 kl. 12:39]

Ein spurning

Hvort er yfirborð Bárðarbungu (fjallsins) að síga eða jökullinn á yfirborði hennar að bráðna (nema hvortveggja sé). Ég hef ekki séð neitt um það. Myndist skál á yfirborðinu er eitthvað að gefa eftir undir yfirborðinu.

[Haraldur Sigurðsson, 27.9.2014 kl. 13:38]

Jú, ég fjallaði einmitt um þetta í fyrirlestri mínum hjá Ferðafélagi Íslands á fimmtudag sl.  Setti fram þá hugmynd að sigið á yfirborði jökulsins væri bæði vegna raunverulegs öskjusigs (botn öskjunnar sígur niður í kvikuþró) og vegna bráðnunar á botni jökuls inni í öskjunni. Þrepsig verða þegar stórir skjálftar ríða yfir, en þess á milli er hægfara sig, ef til vill vegns stöðugrar bráðnunar. Þýðir það að kvika er komin upp undir jöklinum, í botni öskjunnar, eða er það einungis hiti, sem streymir upp sprungur í jarðskorpunni?  Veit ekki....

[Snorri Hansson, 28.9.2014 kl. 01:52]

Þetta náttúrufyrirbrigði er ótrúlega mikilfenglegt og margbrotið.

[Gunnar Ingi Halldórsson (IP-tala skráð) 30.9.2014 kl. 21:38]

Askjan eða tappinn öllu heldur skoppaði a.m.k. áðan ef marka má GPS mælingarnar.