Gangurinn undir Vatnajökli

Öll þjóðin hefur fengist að fylgjast með vexti og þróun berggangsins, sem hefur klofið sér leið í gegnum jarðskorpuna norðaustan við Bárðarbungu.  Hvergi á jörðu er jafn almennur áhugi fyrir hegðun jarðar, enda hafa fyrri byltingar íslenskra eldfjalla haft afdrifaríkar afleiðingar fyrir þjóðina.  Nú virðist kvika úr ganginum hafa náð yfirborði í Dyngjujökli.   ISOR hefur birt ágæta mynda af dreifingu jarðskjálfta undanfarið og tengt virknina nú við fyrri eldvirkni á svæðinu.  Þessa mynd má sjá hér: http://www.isor.is/frettir/holuhraun-kvikuflutningar-fra-bardarbungu

ISOR stingur uppá, að eldgosið sem myndaði Holuhraun við norður rönd Dyngjujökuls árið 1797  kunni að vera komið úr Bárðarbungu, á svipaðan hátt og gosið, sem hófst í dag.  Það gos, árið 1797, braust út á yfirborðið utan jökulsins og olli því ekki jökulhlaupi.

Þróun nýja kvikugangsins er vel lýst í gögnum, sem Jarðvísindadeild Háskóla Íslands hefur birt. Mynd þeirra er hér sýnd fyrir neðan, en hana má finna hér: http://jardvis.hi.is/uppfaert_kort_stadsetning_jardskjalfta_sil_jardskjalftamaelakerfi_vedurstofu_islands_og_faerslur

 

Hreyfingar mældar af GPS stöðvum umhverfis jökulinn gera kleift að mynda líkan af kvikuinnskotinu eða þróun kvikugangsins.  Þetta bendir til gangs sem er um 1,6 m á breidd og um 20 km langur.  Þá vakna spurningar um það, hvaðan kemur kvikan, sem safnast fyrir í ganginum? Kemur hún út úr grunnri kvikuþró, undir öskju Bárðarbungu?  Er kvikustreymi í gangi undir Bárðarbungu, sem kemur dýpra að?   

Athugasemdir

[einar (IP-tala skráð) 23.8.2014 kl. 17:00]

setti upp smá bíó af þróuninni á https://dl.dropboxusercontent.com/u/40576923/bardarbunga.gif

myndin ætti að skýra sig sjálf nema hvað að guli hringurinn er miðgildi á staðsetningu skjálfta hverrar klukkustundar, svarta línan sýnir sögu á miðgildi.

kveðjur

einar

[Haraldur Sigurðsson, 23.8.2014 kl. 18:31]

Einar:  Takk fyrir þetta.  En ég hef eina spurningu:  Sýnir þú alla skjálfta hér, burtséð frá gæðum?  Veðurstofan gefur upplýsingar um gæði á ákvörðun hvers skjálfta. Það er best að sleppa öllum skjálftum sem hafa gæði undir 60%, að mínu áliti.  Þá verður myndin enn skýrari. 

[einar (IP-tala skráð) 23.8.2014 kl. 18:48]

þegar filterað, gæði >= 60

uri-gso kveðjur - þú finnur mig í símaskránni :-)

einar

[Ágúst H Bjarnason, 24.8.2014 kl. 00:36]

Sæll Haraldur

Mig langar bara til að þakka fyrir góðan og fróðlegan pistil.

Með góðri kveðju

[Einar Árnason (IP-tala skráð) 27.8.2014 kl. 19:55]

Haraldur, í Öskju 1875 varð plínískt gos þegar basaltgangur komst í snertingu við súran gúl (eldgos.is). Er eitthvað vitað um efnasamsetningu á þessum kvikugangi núna og efnasamsetningu á því sem er undir Öskju nú? Eru líkur á plínísku gosi ef kvikugangurinn nær inn í Öskju?

Með kveðju

Einar