Fyrstir í Nýja Heiminum: Örvaroddar eldri en Clovis

Norður Ameríka hefur lengi verið kölluð nýji heimurinn.  Þannig litu innflytjendur frá Evrópu á Ameríku, þegar þeir fluttu vestur um haf á átjándu og nítjándu öldinni, í leit að nýju lífi, nýjum ævintýrum og meiri tækifærum.   Antonin Dvorak samdi jafnvel heila symfóníu um hugmyndina.  Meginlandið ber nafn með rentu, því að mannkynið uppgötvaði það tiltölulega nýlega.  Lengi var talið, að fyrstu menn hefðu komið til Ameríku frá Asíu fyrir um það bil 13 þúsund árum, og gengið yfir Beringssund á ísöldinni þegar sjávarstaða var mun lægri en hún er í dag.  Þeir voru nefndir Clovis, og helsta einkenni þeirra voru fagurlega gerðir örvaroddar og spjótsoddar, eins og fyrsta myndin sýnir. Ef svo er, þá er það enn mikil ráðgáta að slíkir oddar hafa aldrei fundist í Síberíu eða austur hluta Asíu, þar sem Clovis  fólkið er talið eiga uppruna sinn.  En nýjar uppgötvanir, sem voru gerðar opinberar í dag,  benda til að Clovis hafi alls ekki verið fyrstu mennirnir í Nýja Heiminum.  Það var uppgröftur á fornleifum í Texas  sem kann að valda byltingu á þessu sviði. Hér komu fram örvaroddar og önnur tól sem eru meir en tvö þúsund árum eldri en Clovis, eða frá því fyrir um fimmtán þúsund og fimm hundruð árum.  Neðri myndin sýnir hluta af efninu sem fannst hér í Buttermilk Creek,  elstu fornminjagröf Norður Ameríku.  Eins og sjá má við samanburð á myndunum, þá eru örvaroddarnir greinilega frumstæðari en Clovis.  Sennilega eru þeir fyrirennarar hinnar glæsilegu Clovis tækni í gerð örvarodda.  Þá er Clovis tæknin amerísk uppfynning, en ekki innflutningur frá Asíu, eins og fyrr var talið.Samanburður á myndunum sýnir að framfarir í myndun örvarodda var ótrúlega mikil á rúmlega tvö þúsund árum.

Athugasemdir

[Vilhjálmur Örn Vilhjálmsson, 25.3.2011 kl. 14:57]

Eru "örvaroddarnir" í Buttermilk Creek "frumstæðir", eða voru framleiðendur þeirra frumstæðari en þeir sem gerðu? Þegar ég las um málið í New York Times, læddist að mér sá grunur að fornleifafræðingarnir í Buttermilk Creek gætu verið dálítið frumstæðir, þ.e.a.s. einþykkir.

Það eru greinilega margar fallgryfjur í tengslum við þennan fund, og ekki eru þetta nú allt örvaroddar hjá þeim sem voru að slá tinnu í Buttermilk Creek hér um árið á undan þeim sem bjuggu til hina fínu "Clovis" odda.

Verklag og fagurfræði gripa þarf ekki að tengjast menningarlegu stigi manna. Á víkingaöld bjuggu menn til lélegri keramík en fyrr á járnöld og á bronsöld, en á víkingaöld voru menn komnir lengra á mörgum sviðum forfeður þeirra nokkrum öldum áður.  

[Vilhjálmur Örn Vilhjálmsson, 25.3.2011 kl. 14:58]

en forfeður þeirra nokkrum öldum áður, átti að standa í síðustu setningunni.

[Haraldur Sigurðsson, 25.3.2011 kl. 16:40]

Að sjálfsögðu getur myndin breyst þegar meiri gögn koma fram. Eins og er höfum við tvö stig: fyrra stig fyrir um 15500 árum, með frumstæðari tól, og síðara stig fyrir um 13000 árum með miklu fullkomnari tól. Spruningin er: eru fínu tólin þróun úr hinum frumstæðari, eða eru fínu tólin komin úr allt annari átt, til dæmis frá Soluterian menningu Evrópu á sama tíma? Blogga meira um það síðar.

[Hörður Þórðarson, 25.3.2011 kl. 20:08]

Staðreyndin er sú að vitum lítið um mannkynsöguna. Það sem kemur einna mest í veg fyrir að við lærum um hana er sú árátta "vísindamanna" að hanga á sínum eigin hugmyndum og kenningum og afskrifa allt sem sýnir eitthvað annað.

Það er synd að margt sem kennt er um sögu mannkyns og sett fram sem óhagganlegar staðreyndir eru þegar betur er að gáð tilgátur sem fá raunveruleg gögn styðja.

[Haraldur Sigurðsson, 25.3.2011 kl. 20:26]

Er þetta ekki það sem við köllum framfarir?