Rennur jökull Bárðarbungu niður í skálina?

Halldór Björnsson hefur stungið uppá hér fyrir neðan að sigið í Bárðarbungu sé ekki að hægja á sér, eins og ég hef haldið fram hér í síðasta bloggi, heldur sé jökullinn að renna inn í sigdældina. Ég sting uppá að sigið sé að hægt á sér, vegna þess að kvikuþrýstingur inni í kvikuþrónni undir öskjunni sé að dvína og þá sígur botn öskjunnar hægar niður. Við skulum líta á þetta og bera hegðun skálarinnar saman við hegðun annara jökla.   Sigið nemur nú um 45 metrum í miðri skálinni. Radíus hennar er um 5 km. Þá er hallinn 1:110, eða um 0,5 gráður. Jöklar bregðast lítt eða ekki við í svo litlum halla. Myndin sem fylgir (frá Haeberli 1995) sýnir halla jökla á Suðurskautinu á móti viðbragðstíma. Lítill halli eins og 0,15 gráður kemst ekki einu sinni á blað hér. Viðbragðstími í minnsta halla (5 gráður) á línuritinu er um hundrað ár. Á þessum rökum er hægt að álykta að sennilega sé lítið eða ekkert rennsli á jöklinum inn í skálina. Þá álykta ég að breytingar á síginu orsakist af breytingum í kvikuhólfinu undir.

Athugasemdir

[Ólafur Jónsson (IP-tala skráð) 17.11.2014 kl. 07:16]

Hvað ef allt er á floti undir jöklinum vegna varmatilfærslu í gegnum bergið?

[Ragna Birgisdóttir, 17.11.2014 kl. 10:54]

Sæll Haraldur! 

Ég er búin að velta því fyrir mér lengi hvers vegna engin flóð hafa komið í Jökulárnar á meðan á öllum þessum hamförum stendur? Miðað við þennan mikla hita og bráðnun undir jökli er með ólíkindum að engin flóð skuli hafa verið. Er það eitthvað sem við megum eiga von á á næstunni?

[Guðmundur Jónsson, 17.11.2014 kl. 11:24]

“ Ég sting uppá að sigið sé að hægt á sér, vegna þess að kvikuþrýstingur inni í kvikuþrónni undir öskjunni sé að dvína og þá sígur botn öskjunnar hægar niður.“

Ég hefði haldið að þetta væri svona. (kannski það sem þú át við)

þegar efri hluti öskjunnar lækkar, lækkar vökvasúlan  BB megini og því verður minni þrýstingur á eftir kvikunni út. Afleiðingin er þá hægara rennsli út úr kvikuhólfinu og þess vegna sígur askjan hægar eftir því sem frá líður.  

Það er að seigja lækkaður þrýstingur í BB er þá afleiðing en ekki orsök sigsins ? 

Það skiptir líka máli að gígarnir í HH eru alltaf að hækka og hrauntjarnirnar þar hafa hækkað svipað eða jafnvel meira en það sem sigið hefur lækkað. Ef beint vökvasamband er á milli BB og HH þá lækkar vökvasúlan líka vegna þess, sem hefur þá sömu áhrif á hraða sigsins/rennslisins. 

 

 

[Haraldur Sigurðsson, 17.11.2014 kl. 13:20]

Ólafur: Ég held að það séu engin gögn, sem bendi á að mikið vatn hafi safnast fyrir undir jöklinum í öskju Bárðarbungu.  En vafalaust er það eitthvað, eins og sigkatlarnir benda á.

[Haraldur Sigurðsson, 17.11.2014 kl. 13:22]

Ragna:  Flóð gerast aðeins ef kvika kemur upp í öskjunni eða ef mikill jarðhiti bræðir jökulinn.  Auk þess þarf vatnsmagnið að verða það mikiða að það nái upp fyrir skörð sem eru í öskjubrúninni.  Skörðin eru í um 1350 til 1450 metra hæð, en botn öskjunnar er í um 11 metra hæð yfir sjó. Ekkert sem bendir til að hætta sé á jökulhlaupum.  Ekki enn...

[Haraldur Sigurðsson, 17.11.2014 kl. 13:24]

Guðmundur: Við byrjum með kvikuhólf, þar sem þrýstingur er hár.  Þá brýst kvika út úr kvikuþrónni út í ganginn og út í Holuhraun.  Kvikurennsli hefst út úr þrónni.  Þá byrjar þrýstingur að minnka í kvikuþrónni og þakið (botn öskjunnar) byrjar að síga að sama skapi.

[Jón Atli (IP-tala skráð) 24.11.2014 kl. 11:21]

Takk fyrir þína frábæru pistla. Ein spurning varðandi viðbragðstíma jökla á Suðurskautinu:

Einhver tíma heyrði ég að dýpt jökulsprunga í Grænlandsjökla væri mun meiri en í íslenskum jöklum vegna lægri hita í ísnum á Grænlandi. Þó ég viti ekki hvort þetta sé rétt þá vaknar samt sú spurning hvort graf Haeberli sé háð hitastigi jökulsins, hvort viðbragðstími íslenskra jökla gæti verið styttri vegna hærri hita?

[Haraldur Sigurðsson, 24.11.2014 kl. 12:55]

Jón Atli: Það kann að vera rétt hjá þér. En held að það sé ekki næg skýring.