Holuhraun í hnattrænu samhengi

Kvikan, sem hefur komið upp í Holuhrauni til þessa er nú vel yfir einn rúmkílometri að magni. Þetta er því ef til vill stærsta gosið á Íslandi síðan Skaftáreldar geisuðu árið 1783. En hvar er gosið í alþjóðlegu samhengi? Árið 1991 var stórgos í eldfjallinu Pinatubo á Filippseyjum, með um 5 rúmkílómetra af kviku. Nokkrum mánuðum síðar gaus Cerro Hudson í Síle og þá komu upp um tveir rúmkílómetrar. Kilauea á Hawaií hefur gosið stöðugt í meir en þrjátíu ár (síaðn 1983) og upp er komið um 4 rúmkílómetrar í því gosi, sem enn stendur yfir. Síðasta stórgosið var í Puyehue-Cordon Caulle eldfjalli í Síle á Suður Ameriku árið 2011, en þar kom upp um 2 rúmkílómetrar af hrauni og gjósku.  Gosið í Holuhrauni skipar sér nú í hóp með þessum stórgosum á tuttugustu og tuttugu og fyrstu öldinni. Þessar rúmmálstölur vísa allar á magn kvikunnar.

Athugasemdir

[Ómar Ragnarsson, 21.11.2014 kl. 14:18]

Og öll eru þessi gos smá í samanburði við Skaftáreldagosiðs og Eldgjárgosið 934. 

[Haraldur Sigurðsson, 22.11.2014 kl. 02:12]

Rétt er það, enda var ég að tala um gos á síðustu öld, ekki fyrir mörgum öldum. Ef við förum aftur til 1815, þá erum við komin með 100 rúmkílómetra gos í Tamboru á Indónesíu, sem er mörgum sinnum stærra en stóru sprungugosin á Íslandi.