Goshringir

Reykhringir myndast þegar maður andar frá sér skýi af vindlareyk og blæs um leið gat í gegnum skýið. Þá vefst uppá reykinn og hann myndar fallegan hring.  Eldgos mynda oft reykhringi, en nú hafa náðst góðar myndir af reykhringjum yfir Eyjafjallajökli. Það er Kjartan Már  Hjálmarsson á Selfossi sem tók báðar þessar frábæru myndir laugardaginn 1. maí. Hringarnir eru örugglega tengdir gosinu. Sennilega myndast hringirnir í gufuskýum þeim sem nú rísa uppaf Gígjökli, þar sem gufan myndast vegna hraunrennslis undir jöklinum.  Frábærur reykhringir hafa einnig sést yfir Etnu eldfjalli á eynni Sikiley á Ítalíu, einkum í gosinu árið 2000, eins og myndin fyrir neðan sýnir.   Þeir voru allt að 200 metrar í þvermál og endast oft í allt að 15 mínútur. 

Athugasemdir

[Njörður Helgason, 3.5.2010 kl. 21:43]

Mig minnir að Ómar eða einhver af hanns vinnufélögum hafi tekið mynd af reykhringjum frá Heklugosi á síðustu öld. Man ekki alveg árið. 1980 mögulega.

[Eggert Þröstur Þórarinsson (IP-tala skráð) 3.5.2010 kl. 22:37]

Sæll Haraldur.

Þakka þér fyrir mjög góða og fræðilega pistla. Núna er sú litla jarðskjálftavirkni sem er í Eyjafjallajökli á miklu dýpi. Hvernig ber að túlka það?

Með fyrirfram þökk. 

[Marinó G. Njálsson, 3.5.2010 kl. 23:22]

Ég sá þennan hring í gær og fylgdist með honum þar til hann hvarf af skjánum.  Hefði viljað ná mynd af honum, en tókst ekki að spóla til baka á vefmyndavél Vodafone.  Ég eiginlega trúði ekki mínum eigin augum og hélt fyrst að þarna væri flugvél á ferð.

[Þorvaldur Gröndal (IP-tala skráð) 3.5.2010 kl. 23:49]

Sælir!

Ég fann hringinn á vefmyndavél Vodafone á eftirfarandi tíma:

Dagsetning: Sat, 01 May 2010 16:11:00 GMT

Skemmtilegt fyrirbæri!

[Hörður Finnbogason, 4.5.2010 kl. 00:27]

Við tókum eftir þessum dularfulla hring (sjá á flickr.com)